Er draumajólatréð í Laugalandsskógi?

Skógræktarfélag Eyfirðinga býður fólk velkomið í Laugalandsskóg á Þelamörk til að finna þar sitt draumajólatré. Ekki skiptir máli hversu stórt eða lítið tréð er, öll kosta þau það sama eða tíu þúsund krónur. 

Hægt er að koma í skóginn tvær helgar í desember og höggva tré að eigin vali. Helgarnar sem um ræðir eru  7,-8. des. og 14.-15. des. milli kl. 11 og 15.  Fyrir þá sem ekki þekkja til þá er Laugalandsskógur í Hörgársveit gegnt Þelamerkursundlaug. Sé ekið frá Akureyri er beygt til vinstri við bæinn Grjótgarð. Stjórnarfólk úr Skógræktarfélagi Eyfirðinga tekur á móti gestum og býður upp á kakó og ketilkaffi á staðnum. 

Þá verður líka hægt að kaupa íslensk jólatré í Kjarnaskógi og verður almenn jólatrésala opin alla daga milli kl. 10 og 18 frá og með 5. desember.