Jólastemning á árlegri skemmtun í Kjarnaskógi

Fjöldi fólks lagði leið sína á Birkivelli í Kjarnaskógi í gær eins og venjulega þegar árleg jólatrésskemmtun Skógræktarfélags Eyfirðinga er haldin. Börn á öllum aldri skemmtu sér vel við leik og söng, dansað var í kringum rauðgrenijólatréð við grillhúsið og boðið upp á kakó og rjúkandi ketilkaffi. Dúettinn Birkibandið spilaði og söng og sveinar tveir sem sagðir eru búsettir steinsnar frá skóginum fallega – á Súlumýrabraut 347, litu við og skemmtu sjálfum sér og öðrum. Þar voru á ferð bræðurnir Hurðaskellir og Kjötkrókur sem fengu góðar viðtökur að vanda.