BSO-húsið nánast tilbúið í ferðalagið

Stefnt er að því að flytja BSO-húsið úr miðbæ Akureyrar að Jólagarðinum í Eyjafjarðarsveit einhvern næstu daga. Húsinu hefur verið lyft frá jörðu og undirbúið fyrir flutning og skipulagsnefnd Eyjafjarðarsveitar hefur afgreitt umsókn um bráðabirgðastöðuleyfi fyrir húsið.

Eins og greint hefur verið frá í fréttum auglýsti Akureyrarbær húsið gefins, gegn því að það yrði flutt burt úr miðbænum eigi síðar en 15. júní. Að auglýsingafresti loknum voru umsóknir metnar og skipulagsráð samþykkti síðan að Jólagarðurinn fengi húsið. Undanfarið hefur verið unnið að því að undirbúa það fyrir flutninginn, enda rennur fresturinn til að færa húsið út innan fárra daga.

Á fundi sínum síðastliðinn mánudag tók skipulagsnefnd Eyjafjarðarsveitar fyrir umsókn frá Jólagarðinum um stöðuleyfi fyrir húsið vestan Jólahússins, á meðan unnið væri að undirbúningi fyrir framtíðarstaðsetningu þess. Skipulagsnefnd samþykkti að leggja til við sveitarstjórn að veita stöðuleyfi til 12 mánaða á lóðinni og vísaði umsókninni til afgreiðslu byggingafulltrúa.