BSO húsið komið á framtíðarstaðinn

BSO húsið, aðsetur leigubílstjóra á Akureyri til áratuga, var í kvöld flutt af lóðinni á horni Strandgötu og Glerárgötu í miðbænum að Jólagarðinum í Eyjafjarðarsveit. Húsið var fyrr í dag híft upp á vagn, eins og akureyri.net sagði frá undir kvöld, og vörubíll dró gamla timburhúsið fram í fjörð.

Lögregla var með í för vegna þess að húsið er svo breitt að stöðva þurfti aðra umferð á meðan. Ferðin gekk eins og í sögu og húsinu hefur verið komið fyrir á bílastæðinu við Jólagarðinn eins og sjá má á myndum Þorgeirs Baldurssonar. Ekki er endanlega ákveðið hvar á svæðinu húsið verður staðsett þegar starfsemi hefst í því á ný.