Andrésar leikunum frestað til 13. maí

Framkvæmdanefnd Andrésar andar leikanna hefur ákveðið að fresta þeim um þrjár vikur vegna covid ástandsins. Leikarnir áttu venju samkvæmt að hefjast á sumardaginn fyrsta, sem nú er 22. apríl, en verða 13.-15. maí. Keppni hefst því á uppstigningardag.

„Leikarnir skipa stóran sess í hjörtum allra skíða- og brettakrakka og er sá viðburður sem mörg börn bíða allt skíðaárið eftir! Því er það okkur mikilvægt að geta haldið leikana í ár og gefið krökkunum þannig færi á að koma og hittast í leik og keppni,“ segir Gísli Einar Árnason í Andrésar andar nefndinni. „Til þess að það geti orðið að veruleika þarf að létta á sóttvarnartakmörkunum og opna skíðasvæðin, og við erum mjög jákvæð og bjartsýn á að það gangi eftir. Hlíðarfjall skartar sínu fegursta þessa dagana og þar er nægur snjór til að halda leikana um miðjan maí!“ segir Gísli.