Peningarnir búnir og vinnu hætt í bili

Framkvæmdir við byggingu nýrrar Miðgarðakirkju í Grímsey hafa verið stöðvaðar vegna fjárskorts. Þetta kemur fram á vef RÚV.

Miðgarðakirkja brann til kaldra kola í september 2021. Fljótlega var ákveðið að ráðist yrði í byggingu nýrrar kirkju, en fé sem til var í framkvæmdina nú uppurið; tryggingafé, framlag ríkisstjórnarinnar og þeir fjármunir sem söfnuðust meðal almennings.

„Peningarnir eru búnir, sem við fengum í þetta. Bæði náttúrulega tryggingarféð og það sem var til og svo vorum við búnir að fá mikla og góða styrki alls staðar að úr heiminum eiginlega. En þeir peningar eru hreinlega búnir þannig að verkið er stopp í augnablikinu. Við erum að bíða hvort við getum safnað meiri pening því við viljum ekki fara að setja kirkjuna í stórar skuldir,“ segir Svafar Gylfason, íbúi og sóknarnefndarmeðlimur í Grímsey í samtali við RÚV.

Smellið hér til að sjá frétt RÚV