MA vann MORFÍs, Krista ræðumaður kvöldsins

Lið Menntaskólans á Akureyri sigraði í kvöld í MORFÍs, Mælsku- og rökræðukeppni framhaldsskóla á Íslandi. MA lagði Flensborgarskóla að velli þegar keppt var til úrslita í Háskólabíói.

Greint var frá úrslitunum á Facebook MA eftir miðnætti. Þar kemur fram að dómarar útnefndu Kristu Sól Guðjónsdóttur úr MA ræðumann kvöldsins. 

Skólarnir þrættu um veru Íslands í Atlantshafsbandalaginu, NATÓ, MA var á móti en Flensborg með.

Ræðumenn MA voru Benjamín Þorri Bergsson, Krista Sól Guðjónsdóttir og Heiðrún Hafdal Björgvinsdóttir. Liðsstjóri er Reynir Þór Jóhannsson. Auk þeirra skipa Þórhallur Arnórsson og Sjöfn Hulda Jónsdóttir lið MA. Þau eru svokallaðir „liðsmenn í sal“.