Keflavík valtaði yfir andlausa KA-menn

KA sótti Keflavík heim í efstu deild karla, Bestu deildinni, í kvöld. Heimamenn réðu lögum og lofum allan leikinn og gerðu í raun út um hann í fyrri hálfleik með því að skora þrjú mörk. Ekkert var skorað eftir hlé og 3:0 tap KA-manna setur þá í slæma stöðu við botn deildarinnar.

Fyrir leikinn voru KA-menn jafnir grönnum sínum í Þór með 15 stig og aðeins FH er neðar í deildinni. Með sigri hefði KA þokað sér upp að hlið Stjörnunnar í 8. sæti en tapið þýðir að alvöru botnbarátta blasir við. Ekki síst vegna þess að frammistaða liðsins í kvöld verðskuldaði ekki stig og ef liðið heldur áfram á þessari braut er stutt í Lengjudeildina.

Keflavík var mun sprækara liðið í kvöld og sigurinn hefði alveg getað orðið stærri. Ívar Arnbro Þórhallsson í marki KA bjargaði tvívegis vel í seinni hálfleik, þegar Keflvíkingar voru komnir í dauðafæri. Og þá voru KA-menn reyndar einum leikmanni fleiri á vellinum, eftir að einn Keflvíkingurinn var rekinn af velli þegar hálftími var eftir. Þrátt fyrir það náði KA ekki að ógna marki heimamanna að neinu ráði.

Eftir að hafa tapað sex leikjum í röð náði KA loks sigurleik gegn ÍA þann 12. júlí og í kjölfarið komu jafntefli gegn ÍBV og Þór. Ef miðað er við leikinn í Keflavík í kvöld og frammistöðu liðsins þar, er óvíst að sigurleikirnir verði mikið fleiri á þessu tímabili. En ljósið í myrkrinu er þó sú staðreynd að neðri hluti deildarinnar er mjög jafn og nokkrir sigurleikir gætu fleytt þeim upp í efri hluta deildarinnar. En eins og staðan er núna er líklegra að liðið þurfi að heyja harða baráttu fyrir því að halda sæti sínu í deildinni.

Meira seinna