Íslandsmeistarabikar á loft hjá KA í kvöld?

Karlalið KA í blaki tekur á móti liði Þróttar úr Reykjavík í þriðja leik liðanna í úrslitaeinvígi Íslandsmótsins í blaki, Unbroken-deildinni, í KA-heimilinu í kvöld. KA hefur 2-0 forystu í einvíginu og getur tryggt sér Íslandsmeistaratitilinn í kvöld.

KA vann fyrstu viðureignina í einvíginu á Akureyri 3-0, en önnur viðureignin var jafnari. KA hafði þó sigur á endanum, 3-2, og er því komið í kjörstöðu fyrir heimaleikinn í kvöld. Vinna þarf þrjá leiki til að vinna titilinn. 

Karlaliðið er þó ekki alveg jafn hlaðið bikurum og kvennaliðið. Vinni þeir Íslandsmeistaratitilinn verður það aðeins þriðji bikar þeirra á leiktíðinni, en konurnar hafa unnið fjóra. Karlaliðið er bikarmeistari og deildarmeistari og getur bætt Íslandsmeistaratitlinum í safnið í kvöld.

• Íslandsmót karla í blaki, Unbroken-deildin, úrslitaeinvígi, leikur 3
  KA-heimilið kl. 19:30
  KA - Þróttur R.