Þór/KA fær miðjumann frá Stjörnunni

Þór/KA hefur fengið til sín Henríettu Ágústsdóttur á lánssamningi frá Stjörnunni, samkvæmt samningi félagsins við knattspyrnudeild Stjörnunnar. Henríetta er miðjumaður, tæplega tvítug og hefur spilað 23 leiki í efstu deild.

Í frétt félagsins kemur fram að Henríetta hafi spilað 82 leiki og skorað fjögur mörk í meistaraflokki fyrir HK og Stjörnuna. Þá á hún einnig að baki 12 leiki með yngri landsliðum Íslands, U19, U17 og U16. Hún kemur upphaflega úr röðum HK, en skipti í Stjörnuna fyrir tímabilið 2024.