Pistlar

Frumflytja verk eins organista fyrir annan

Rakel Hinriksdóttir skrifar 07. febrúar 2025 | kl. 13:00

Þorvaldur Örn Davíðsson er tónskáld, organisti í Akureyrarkirkju og kórstjóri. Um helgina verður sjónum beint að honum sem tónskáldi, en kórinn Hymnodia mun flytja úrval verka eftir Þorvald á hádegistónleikum í Akureyrarkirkju á morgun, laugardaginn 8. febrúar kl. 12.

Á efnisskrá tónleikanna eru fjölbreytt kórverk og eitt orgelverk sem Þorvaldur samdi fyrir kollega sinn, Eyþór Inga Jónsson, en það hefur ekki verið flutt áður hér á landi.

„Afar syngjandi laglínur, spennandi hljómsetningar, frumleiki en á sama tíma virðing fyrir eldri tónskáldum einkenna tónsmíðar Þorvaldar Arnar. Verkin eru allt frá því að vera stuttar og lágstemmdar perlur í að vera margradda, kraftmikil kórverk með orgelundirspili og einsöngsköflum,“ segir í tilkynningu.

Einsöngvarar í kórverkum eru þær Jóna Valdís Ólafsdóttir og Margrét Árnadóttir. Eyþór Ingi Jónsson og tónskáldið sjálft, Þorvaldur Örn Davíðsson stjórna. HÉR er hlekkur á viðburðinn á Facebook.

Til baka í yfirlit pistla