Frábær mörk í leik KA og ÍA – MYNDBAND

KA vann ÍA 5:1 í Bestu deildinni í knattspyrnu í gær á heimavelli, eins og akureyri.net greindi frá. Áhorfendum var boðið upp á stórglæsileg mörk.

Leikurinn byrjaði með látum. Baldvin Þór Berndsen kom Skagamönnum yfir strax á 7. mínútu „með stórkostlegu marki. Þrumuskot langt utan af velli beint upp í samskeytin. Eitt glæsilegasta mark ársins – en samt bara það næstfallegasta í leiknum!“ skrifaði Valur Sæmundsson í umfjöllun akureyri.net í gær.

Fimmta og síðasta mark leiksins var nefnilega stórbrotið; Hallgrímur Mar Steingrímsson fékk boltann í miðjuhringnum, á eigin vallarhelmingi, sá að markvörður Skagamanna var töluvert langt frá marki sínu og KA-maðurinn hikaði ekki heldur sendi boltann með mögnuðu skoti rakleiðis í netið!

Sjón er sögu ríkari – Smellið á myndinni hér að neðan, skjáskot af Vísi, til að sjá öll mörkin í leikjum gærdagsins í neðri hluta Bestu deildarinnar. Markaveislan á KA-velli hefst þegar 1 mínúta og 12 sekúndur eru liðnar.