Dagur Sjúkrahússins gekk eins og í sögu

Árleg hátíð Hollvinasamtaka Sjúkrahússins á Akureyri (SAk) og starfsfólks stofnunarinnar á Glerártorgi var í gær. Hollvinir skráðu nýja félaga og starfsmenn SAk buðu upp á mælingu á blóðþrýstingi, súrefnismettun og púlsi, auk þess sem koma mátti með bangsa eða dúkkur í læknisskoðun.

Margir lögðu leið sína á Glerártorg og stemningin var góð, að sögn Hildu Jönu Gísladóttur, samskiptastjóra SAk. „Þetta gekk bara allt eins og í sögu,“ sagði hún.

Framlagið skiptir sköpum

Margoft hefur komið fram að Hollvinir SAk skipta stofnunina gríðarlegu máli; í haust var til dæmis upplýst að á síðasta ári færðu Hollvinasamtökin SAk gjafir að verðmæti 62 milljóna króna en á því ári var fjárfestingaheimild SAk á fjárlögum 200,6 milljónir. Gjafir Hollvina námu því um 31% af framlagi ríkisins til fjárfestinga árið 2024. 

„Framlag Hollvina skiptir SAk einfaldlega sköpum, sem og framlag annarra aðila í samfélaginu til sjúkrahússins. Það er hreinlega óhugsandi að sjá fyrir sér stöðu tækjabúnaðar á sjúkrahúsinu ef ekki kæmi til gjafa frá utanaðkomandi aðilum,“ sagði þá Konráð Gylfason, framkvæmdastjóri rekstrar og klínískrar stoðþjónustu.

• Frétt akureyri.net í haust: Hollvinir gáfu fyrri 62 milljónir, 200 á fjárlögum