Bikarúrslit í blaki og ögurstund í íshokkí

Þrjú akureyrsk íþróttalið verða í eldlínunni í dag og mikið undir hjá tveimur þeirra. Kvennalið KA í blaki spilar til úrslita í Kjörísbikarkeppninni og karlalið SA í íshokkí mætir SR í þriðja leik í einvígi um Íslandsmeistaratitilinn og verður að vinna því með sigri í dag hirða Reykvíkingar titilinn. KA/Þór á útileik í handboltanum, en þar er minna í húfi en hjá hinum tveimur liðunum.

Toppliðin í blakinu mætast í bikarúrslitum

KA-konur unnu nokkuð sannfærandi sigur á liði Þróttar R/Blakfélags Hafnarfjarðar í undanúrslitum bikarkeppninnar í blaki, Kjörísbikarsins, á fimmtudagskvöld, 3-1. Fyrr um daginn hafði KA sigrað Aftureldingu 3-0.

HK tryggði sér um liðna helgi deildarmeistaratitilinn í blaki eftir tvær viðureignir við KA, en KA endaði í 2. sætinu. Bikarúrslitaleikurinn verður því á milli tveggja sterkustu blakliða landsins og verður án efa spennandi. HK er með sterkt lið, margar landsliðskonur eins og þjálfainn, Miguel Mateo, benti á í spjalli við akureyri.net eftir sigurinn í undanúrslitunum. En í bikarúrslitum getur auðvitað allt gerst.

• Kjörísbikar kvenna í blaki, úrslitaleikur
  Digranes í Kópavogi kl. 13
  KA - HK
• Útsending: RÚV kl. 12:30
  Opin dagskrá

Þessi lið mættust fjórum sinnum í Unbroken-deildinni í vetur og vann KA allar viðureignirnar. KA vann tvær viðureignir 3-0 á Akureyri í september, 3-2 á útivelli í nóvember og 3-1 á útivelli í febrúar.

KA/Þór fer í Breiðholtið

Enn er þremur umferðum ólokið í Olísdeild kvenna í handknattleik. KA/Þór hefur þegar tryggt sér sæti í fyrstu umferð úrslitakeppninnar þar sem liðin í 3.-6. sæti mætast og keppa um það hvaða lið fara áfram í undanúrslit gegn tveimur efstu liðunum.

KA/Þór á útileik í dag, sækir ÍR heim í Breiðholtið. ÍR-ingar eru í 4. sæti deildarinnar með 20 stig, en KA/Þór er í 6. sætinu með 15 stig.

Fram hefur komið í fréttum að Unnur Ómarsdóttir leikur ekki meira með liðinu þar sem hún er barnshafandi. Þá hefur hin ungverska Anna Petrovic snúið aftur til síns gamla félags í Austurríki, en hún kom til KA/Þórs fyrir tímabilið.

• Olísdeild kvenna í handknattleik, 19. umferð
  Skógarsel í Breiðholti kl. 15:15
  ÍR - KA/Þór
• Útsending: Handboltapassinn í Sjónvarpi Símans
  Áskriftarsjónvarp

Spiluð er þreföld umferð í Olísdeild kvenna og hafa liðin því mæst tvisvar nú þegar í deildinni í vetur, í hnífjöfnum leikjum. ÍR vann með einu marki í Breiðholtinu í október, 30-29, en KA/Þór vann með tveggja marka mun á Akureyri í janúar, 23-21.

Ögurstund hjá SA Víkingum

Þriðji leikur í úrslitaeinvíginu í Toppdeild karla í íshokkí fer fram í Skautahöllinni í Reykjavík síðdegis í dag. SA Víkingar eru komnir með bakið upp að vegg, eins og stundum er sagt, eftir að SR hefur unnið tvo fyrstu leikina, fyrst 6-5 í framlengdum leik í Reykjavík og svo 5-1 á Akureyri á fimmtudagskvöldið. Í dag kemur því ekkert annað til greina en að bíta í skjaldarrendur og berjast til síðasta blóðdropa, ekkert annað en sigur gefur SA Víkingum áframhaldandi líf í úrslitakeppninni, en tap myndi þýða að Íslandsbikarinn færi aftur suður. 

• Toppdeild karla í íshokkí
  úrslitakeppni, leikur 3
  Skautahöllin í Laugardal kl. 17:45
  SR - SA
• Útsending: icehockeyiceland.tv
  Áskrift að rás eða stökum leikjum