Alvöru breskur farsi frumsýndur í Freyvangi

Gamanleikurinn Tom, Dick og Harry eftir breska gamanleikhöfundinn Ray Cooney og son hans Michael Cooney verður frumsýndur hjá Freyvangsleikhúsinu í kvöld, föstudagskvöld. Þetta er fimmta verkið sem Ólafur Jens Sigurðsson leikstýrir í Freyvangi, en blaðamaður akureyri.net sló á þráðinn til Ólafs.

„Verkið er hefðbundinn breskur farsi frá árinu 2006,“ segir Ólafur, um leikverkið. „Það eru ærsl og læti á sviðinu og flækjur sem þarf að leysa. Sagan hverfist um hjón sem ætla að ættleiða barn, en bræður mannsins trufla það ferli töluvert. Það er von á fulltrúa frá ættleiðingarstofunni til þess að taka út heimilið og hjónin, og bræðurnir stefna þessu öllu í hættu.“ 

„Leikhúsgestir fylgja þessum persónum einn dag í þeirra lífi, þar sem margt kemur upp á. Verkið er uppfullt af kómík og látum.“ 

Ólafur Jens segir að ferlið hafi gengið frábærlega, en um er að ræða einvala lið leikara og hafa sumir leikið með Freyvangsleikhúsinu áratugum saman en aðrir eru að koma í liðið í fyrsta skipti. „Þetta er frábær hópur sem er að rúlla þessu upp,“ segir Ólafur Jens að lokum, spenntur fyrir frumsýningunni. 

Miðar á sýninguna eru seldir á tix.is