Gleymda forvörnin

Forvarnir barna eru gríðarlega mikilvægar þegar kemur að lýðheilsu samfélagsins. Þegar rætt er um forvarnir er nær eingöngu talað um mikilvægi íþróttastarfs. Þó er mikilvæg forvörn sem gleymist oft í umræðunni: tónlistarkennsla.

Ritrýndar rannsóknir sýna að virk þátttaka barna í tónlist styður við andlega heilsu, eykur félagsfærni og styrkir sjálfsmynd. Börn sem fá tækifæri til að tjá sig í gegnum tónlist eru líklegri til að þróa með sér seiglu og jákvæða sjálfsmynd, sem skiptir sköpum þegar tekist er á við áskoranir lífsins. Það er kjarni forvarna: að efla innri styrk áður en vandinn verður til.

Tónmenntakennsla í grunnskólum Akureyrarbæjar tók dýfu en hefur verið á uppleið undanfarin ár með samstarfi við Tónlistarskólann á Akureyri. Mikilvægt er að efla þetta samstarf og tryggja að tónmenntakennsla haldi áfram í öllum grunnskólum bæjarins.

Helsta hindrunin fyrir þátttöku grunnskóla í samstarfinu er skortur rými til kennslu innan skólanna. Ein möguleg lausn, sem bent hefur verið á, að setja upp færanlegar kennslueiningar við skólana. Það þarf að tryggja rými innan skóla Akureyrarbæjar fyrir tónmenntakennslu sem gæti einnig nýst fyrir einkatíma nemenda við Tónlistarskólann á Akureyri. Það myndi auðvelda nemendum að sækja nám í sínu skólahverfi, stytta vinnudag nemenda, skapa Tónlistarskólanum meira pláss í Hofi og stytta biðlista.

Sem frambjóðandi VG á Akureyri tel ég ljóst að hér höfum við verk að vinna. Með því að hugsa skipulagið heildrænt getum við brotið niður þær hindranir sem í dag standa í vegi fyrir jöfnu aðgengi barna að tónlistarnámi.

Það er kominn tími til að hætta að líta á tónlist sem aukaatriði. Hún er lykilþáttur í velferð barna, og þar með framtíð Akureyrar.

Stefán Oddur Hrafnsson er faðir, kennaranemi, og situr í öðru sæti á lista Vinstrihreyfingarinnar græns framboðs á Akureyri