Akureyri tengd til framtíðar

Það er auðvelt að taka fjarskiptum sem sjálfsögðum hlut. Netið á bara að virka. Farsíminn á að ná sambandi. Fyrirtæki eiga að geta sinnt viðskiptavinum sínum, börn að læra heima þegar á þarf að halda, fólk að vinna fjarvinnu og fjölskyldur að halda sambandi við heiminn. En á bak við þessa daglegu þjónustu liggja innviðir sem þarf að byggja upp, viðhalda og styrkja til framtíðar.

Á undanförnum árum höfum við hjá Mílu lagt mikla áherslu á uppbyggingu fjarskiptainnviða á Akureyri og í nærliggjandi byggðum. Markmiðið er skýrt: Að íbúar, fyrirtæki og stofnanir á svæðinu hafi aðgang að fjarskiptum sem standast kröfur nútímans og framtíðarinnar.

Koparinn kveður

Stærsta breytingin fyrir heimili og fyrirtæki á undanförnum árum er ljósleiðari. Míla býður í dag ljósleiðaratengingar um nær allt svæðið og gamla koparkerfið, sem hefur þjónað landsmönnum í meira en heila öld, er á leið út. Ljósleiðari er hraðari, stöðugri og framtíðarvænni tenging en eldri kopartækni. Hann ræður betur við meira gagnamagn, fleiri tæki á heimilum og sívaxandi kröfur um öruggt og stöðugt samband.

Til að ráða við framtíðina hefur Míla einnig uppfært aðgangsnet sitt á Akureyri í 10 gígabita hraða eða 10x. Það er tífalt meiri hraði en það sem þótti hefðbundin nettenging fyrir rétt rúmum tveimur árum. Fyrir hinn almenna notanda þýðir þetta betri upplifun: Stöðugri fjarfundir, hraðari skýjaþjónustur, betri streymiþjónusta, öflugri tenging fyrir tölvuleiki og meiri möguleikar fyrir heimili þar sem mörg tæki eru í notkun á sama tíma. Fyrir atvinnulífið þýðir þetta aukið svigrúm til vaxtar, stafrænnar þjónustu og nýrra starfa.

Bein tenging við útlönd eflir stafrænt öryggi

En uppbyggingin á Akureyri snýst ekki aðeins um hraða. Hún snýst líka um öryggi og seiglu. Með frumkvæði Mílu og samstarfi við Farice hefur verið komið á fót nýjum alþjóðlegum tengipunkti á Akureyri. Það þýðir að netumferð til og frá landinu þarf ekki lengur í öllum tilvikum að fara um suðvesturhorn landsins áður en hún fer áfram til útlanda. Akureyri verður þannig mikilvægari hluti af stafrænu öryggisneti Íslands. Þetta skiptir máli fyrir allt landið. Þegar fjarskiptaleiðir eru fleiri en ein, og þegar mikilvægar tengingar eru dreifðar landfræðilega, minnkar hættan á því að ein bilun, eitt náttúruatvik eða eitt staðbundið áfall hafi mikil áhrif á þjónustu. Akureyri verður þannig ekki aðeins betur tengd við umheiminn heldur verður bærinn einnig hluti af varaleið og öryggisinnviðum sem styrkja íslenskt samfélag í heild.

Þessi uppbygging hefur einnig bein áhrif á atvinnuþróun á Norðurlandi. Gagnaver, hátæknifyrirtæki og stafrænir þjónustuaðilar gera miklar kröfur til fjarskipta. Þau þurfa mikinn hraða, lágan svartíma, öryggi og fjölbreyttar tengileiðir. Míla hefur stutt við uppbyggingu AtNorth á Akureyri með því að tryggja fjölbreyttar tengingar, þrefaldar varaleiðir og aðgreindar leiðir bæði innan sveitarfélagsins og á landsvísu. Slíkt skiptir sköpum þegar fyrirtæki velja sér staðsetningu fyrir mikilvægan stafrænan rekstur.

Hraðbraut gagna um ljósleiðara

Míla hefur jafnframt styrkt stafrænu stofnleiðirnar inn til Akureyrar með ljósbylgjulengdar-tækni (DWDM), sem má líkja við fjölakreina hraðbraut fyrir gögn á ljósleiðara. Með þeirri tækni er hægt að flytja gríðarlegt gagnamagn á mjög miklum hraða. Það skapar forsendur fyrir kröfuhörðustu viðskiptavini, þar á meðal gagnaver, stór fyrirtæki, opinberar stofnanir og þjónustu sem þarf að vera aðgengileg allan sólarhringinn.

Samhliða þessu hefur farsímasendum fyrir 5G verið fjölgað og samband bætt fyrir Símann, Hringdu og aðra sem nýta farsímasenda Mílu bæði á Akureyri og í nærliggjandi svæðum. Öflugt farnet er ekki lengur aðeins þægindi; það er hluti af daglegu öryggi og virkni samfélagsins. Íbúar þurfa gott farsímasamband heima, á ferðinni og í vinnu. Fyrirtæki þurfa öruggar tengingar fyrir greiðslulausnir, þjónustukerfi, öryggiskerfi og tæki. Ferðamenn þurfa að komast í samband. Viðbragðsaðilar og samfélagsleg þjónusta þurfa innviði sem eru traustir þegar mest á reynir.

Akureyri hefur alla burði til að vera leiðandi stafrænn þjónustu- og innviðakjarni utan höfuðborgarsvæðisins. Þar skiptir máli að bærinn hafi ekki aðeins fallegt umhverfi, góða orku og öflugt samfélag, heldur einnig fjarskiptainnviði sem standast alþjóðlegar kröfur. Fjarskipti eru ekki aðeins tæknimál. Þau eru lífsgæði, öryggismál og atvinnumál. Þau ráða því hvar fólk getur búið, hvar fyrirtæki geta vaxið og hversu vel samfélög geta brugðist við framtíðinni. Með áframhaldandi fjárfestingu í innviðum á Akureyri vill Míla tryggja að Norðurland standi jafnfætis bestu stafrænu svæðum landsins og að Akureyri sé tengd framtíðinni, hratt og örugglega.

Erik Figueras Torras er forstjóri Mílu