Þrjú verkefni fengu styrk úr Sprotasjóði

Þrír skólar á Akureyri fengu styrk úr Sprotasjóði fyrir skólaárið 2026-2027 en styrkirnir voru afhentir um nýliðna helgi. Alls bárust sjóðnum 39 umsóknir og 20 verkefni hlutu styrk. Samtals var úthlutað  tæpum 65 milljónum króna að þessu sinni.

Sprotasjóður leik- grunn- og framhaldsskóla styður við þróun og nýjungar í skólastarfi í samræmi við stefnu stjórnvalda og aðalnámskrá viðkomandi skólastiga.

Áherslusvið sjóðsins vegna ársins 2026 voru tvenns konar:

• Grunnþáttur menntunar: Lýðræði og mannréttindi.
• Nýjar leiðir í kennsluaðferðum og námsmati með sjálfstæði og virkni nemenda að markmiði.

Inga Sæland, mennta- og barnamálaráðherra, og Bragi Þór Svavarsson, formaður stjórnar sjóðsins, afhentu styrkina við hátíðlega athöfn sl. laugardag. Þessir skólar á Akureyri hlutu styrk í ár:

• Lundarsel - Pálmholt: Að undrast – samræður í leikskólastarfi. Styrkupphæð 3.360.000 krónur.
• Glerárskóli: Fjársjóðskort og fjölbreyttar kennsluaðferðir. Styrkupphæð 2.500.000 krónur.
• Iðavöllur: Fjárfestum í framtíðinni – jöfn tækifæri til náms. Styrkupphæð 2.000.000 krónur.