Mikið svigrúm fyrir aukið millilandaflug
Sigrún Björk Jakobsdóttir, framkvæmdastjóri Isavia innanlandsflugvalla ehf., segir að afkastageta Akureyrarflugvallar sé langt í frá fullnýtt, enda sé millilandaflug um völlinn einungis tvo daga í viku.
Nýverið þurfti easyJet að færa flug sitt til og frá Manchester frá laugardagsmorgnum til laugardagskvölds, vegna þess að hollenska flugfélagið Transavia fékk úthlutað lendingartíma á laugardögum á vellinum á sama tíma og Manchesterflug easyJet hafði verið. Sigrún útskýrði um hvað málið snýst í frétt akureyri.net í gær. Sjá hér:
- Frétt akureyri.net í gær: EasyJet kaus að færa til laugardagskvölds
- Frétt akureyri.net frá 30. janúar: Manchesterflug fært til kvölds á laugardögum
Að frátöldum laugardögunum segir Sigrún Björk að nægt svigrúm sé til að taka við aukinni umferð millilandaflugs á Akureyrarflugvelli. „Afkastageta flugvallarins er langt í frá fullnýtt, enda einungis millilandaflug um flugvöllinn á þriðjudögum og laugardögum. Allir aðrir vikudagar standa flugfélögum til boða,“ bendir Sigrún Björk á og áréttar að það sé vilji Isavia innanlandsflugvalla ehf. að sem flest millilandaflug séu í boði til og frá Akureyrarflugvelli.
Á þessari mynd frá Isavia sést m.a. að hlutfall millilandafarþega af heildarfjölda farþega um Akureyrarflugvöll fer vaxandi. Enn er þó mikið svigrúm til frekari vaxtar.
Að sögn Sigrúnar getur Akureyrarflugvöllur annað 8 millilandaflugum á dag þá daga þegar það eru þrjár innanlandsvélar en aðra daga séu 9 flugtímar í boði fyrir millilandaflug. Reglan er sú að engar aðrar brottfarir eru leyfðar innan 110 mínútna fyrir alþjóðlega brottför flugvélar með fleiri en 80 sæti.
