Bílaleiga Akureyrar kaupir um 800 bíla
Steingrímur Birgisson, forstjóri Bílaleigu Akureyrar, gerir ráð fyrir að þetta ár verði ámóta og það síðasta hjá ferðaþjónustunni. Fyrirtækið kaupir um 800 nýja bíla í ár, álíka marga og í fyrra. Þetta kemur fram í Morgunblaðinu í dag.
„Það fóru að detta inn bókanir um og eftir páska. Þetta fer hægt og rólega af stað og er í takt við okkar áætlanir. Ég geri ráð fyrir að erlendir ferðamenn verði á bilinu 5-600 þúsund í ár. Þetta ferðamannaár verður álíka og í fyrra. 2020 byrjaði vel og svo var sumarið ágætt. Ég á samt ekki von á að ferðaiðnaðurinn komist á neinn skrið fyrr en á næsta ári,“ segir Steingrímur í blaðinu.
Bílaleiga Akureyrar seldi töluvert af eldri bílum í fyrra. „Við keyptum líka 800 bíla á síðasta ári og munum kaupa annað eins í ár. Við ætluðum að kaupa 1.200-1.300 bíla í fyrra en færðum hluta þeirra yfir á þetta ár. Við kaupum samtals 1.600-1.700 bíla, sem er ágætis endurnýjun. Við erum klárlega með nýjasta flotann. Við viljum halda flotanum eins nýjum og mögulegt er,“ segir Steingrímur.