Vinakaffi og bleikar slaufur í Hrísey

Í tilefni af Viku einmanaleikans stóð Kvenfélag Hríseyjar að Vinakaffi sl. þriðjudag í Hlein. Kvenfélagskonur létu ekki þar við sitja heldur eru þær líka búnar að hengja bleikar slaufur á ljósastaura víðsvegar um þorpið, í tilefni af Bleikum október.

Vika einmanaleikans er vitundarvakning Kvenfélagasambands Íslands gegn einsemd og einmanaleika. Verkefnið stendur frá 3.-10. október og er ætlað að opna á umræðu um einmanaleika í samfélaginu, upplýsa almenning um orsakir og afleiðingar, hvetja til aðgerða og efla samtakamátt í þjóðfélaginu gegn einmanaleika.

Í frétt á Hríseyjarvefnum kemur fram að salurinn í Hlein hafi verið fullur af lífi og fjöri á Vinakaffinu og á fimmta tug eyjarskeggja komu saman og nutu samverunnar yfir kræsingum. „Það var sönn ánægja að sjá hversu margir lögðu leið sína á viðburðinn – slíkar samverustundir minna okkur á mikilvægi þess að hittast, hlæja saman og styrkja tengslin í samfélaginu,“ segir Dröfn Teitsdóttir, gjaldkeri félagsins.

Bleiku slaufurnar eru seldar í Centro á Akureyri og rennur andvirðið óskipt til Krabbameinsfélags Akureyrar og nágrennis. „Í tilefni af Bleikum október vildum við sýna stuðning í verki og lífga upp á umhverfið í leiðinni með þessum fallegu bleiku slaufum. Við settum eina slaufu í hverja götu og vonum að fleiri fyrirtæki og félög á svæðinu kaupi einnig slaufu og taki þátt í þessu frábæra framtaki,“ segir Dröfn.