Bjuggu til knúsbekk við gönguleið í Hrísey

Að fá knús í Hrísey er alls ekki ólíklegt, enda eyjarskeggjar einstaklega vinalegir og hlýir. En nú hafa líkurnar á knúsi í eyjunni jafnvel hækkað, þar sem kominn er upp svokallaður 'Knúsbekkur'. Bekkurinn er á horninu á lóð hússins við Austurveg 49, en ábúendur eru Michael Jón Clarke og Sigurlína Jónsdóttir. Þau settu upp bekkinn, en hugmyndin að honum á rætur sínar að rekja til Noregs.

„Fyrir nokkur mörgum árum var dóttir okkar að starfa sem læknir í Noregi. Þá var svona bekkur í bænum sem hún bjó í,“ segir Michael við blaðamann Akureyri.net. „Okkur fannst þetta sniðugt og tókum þarna myndir, sem við vorum svo að skoða núna nýlega. Þá sagði Sigurlína að það væri sniðugt að útbúa svona í Hrísey.“ 

Vinsæll myndastaður

Til að byrja með var pantað eitthvað járndrasl af Temu til þess að nýta í bekkinn, segir Michael, en það reyndist alveg handónýtt. „Við rukum bara til og keyptum þennan fína bekk í BYKO á tilboði og ég smíðaði smá grind utan um hann sem við skreyttum. Gamli, ryðgaði traktorinn minn hefur verið þarna á horninu og ég tók eftir því að fólk var oft að taka myndir af sér við hann. Svo hef ég séð fjölmargar myndir frá fólki líka síðan bekkurinn var kominn, og þetta virðist falla í góðan jarðveg.“

Skammdegisknús verða kósí

Bekkurinn er staðsettur við upphaf göngustígsins syðst á eyjunni, á hentugum áningarstað. Hann stendur neðst í brekkunni og er tilvalinn til þess að safna kröftum fyrir gönguferð, kasta mæðinni eftir gönguferð eða jafnvel bæði. Michael segir að lokum, að það verði áfram kósí á bekknum þó að fari að skyggja, vegna þess að þau hafi orðið sér út um sólarselluknúna ljósaseríu, sem þau ætli að setja á bekkinn á næstunni.