Þriggja marka sveifla í sigri SA Víkinga

SA Víkingar unnu Fjölni í spennandi baráttuleik í Toppdeild karla í íshokkí sem fram fór í Skautahöllinni á Akureyri í dag. Fjölnismenn leiddu með tveimur mörkum fyrir síðasta leikhlutann, en heimamenn kláruðu leikinn með þremur mörkum á viðburðaríkum kafla í lokaleikhlutanum. Lokatölur urðu 4-3 og eru SA Víkingar á toppi Toppdeildarinnar.

Hvorugu liðinu tókst að skora í fyrsta leikhlutanum, en Fjölnismenn þó líklegri á köflum, sóttu stíft að marki þegar þeir spiluðu einum fleiri nánast í fjórar mínútur samfleytt, en Róbert Steingrímsson stóð vel fyrir sínu í markinu. 

Róbert kom þó ekki vörnum við á annarri mínútu annars leikhluta þegar Fjölnismenn nýttu sér liðsmun eftir refsingu á lið SA. Annar leikhluti var um það bil hálfnaður þegar varnir Fjölnismanna brustu loksins og Heiðar Gauti Jóhannsson jafnaði í 1-1. Aftur náðu Fjölnismenn forystunni þegar langt var liðið á annan leikhlutann og bættu svo við þriðja markinu þegar 13 sekúndur voru eftir af leikhlutanum eftir mistök upp við mark SA. 

Leikar æstust heldur í þriðja leikhlutanum, mistökum fjölgaði og refsingum sömuleiðis. Á tæpum þriggja mínútna kafla nýttu SA Víkingar sér það í þrígang að vera einum og tveimur fleiri eftir refsingar á leikmenn Fjölnis. Gunnar Arason minnkaði muninn í eitt mark og jafnaði í 3-3 innan við mínútu síðar. Í bæði skiptin voru SA Víkingar tveimur fleiri. Daniil Fursa skoraði fjórða mark SA skömmu síðar, enn og aftur þegar heimamenn voru fleiri á svellinu. 

Lokakaflinn hélt áhorfendum á sætisbrúninni, Fjölnismenn reyndu ákaft að jafna leikinn og fengu til þess gullið tækifæri þegar þeir voru tveimur fleiri á ís í dágóða stund, sóttu ákaft og fengu góð færi, en SA Víkingar stóðu af sér áhlaupið og lönduðu 4-3 sigri að lokum. 

SA - Fjölnir 4-3 (0-0, 1-3, 3-0)

SA Víkingar eru áfram á toppi deildarinnar, nú með 19 stig úr níu leikjum, en SR er með 14 stig úr sjö leikjum og Fjölnir 12 stig úr átta leikjum.

Helstu tölur úr leiknum:

SA

Mörk/stoðsendingar: Gunnar Arason 2/1, Daniil Fursa 1/2, Heiðar Gauti Jóhannsson 1/0, Jóhann Már Leifsson 0/2, Birkir Rafn Einisson 0/1, Arnar Kristjánsson 0/1, Atli Sveinsson 0/1.
Varin skot: Róbert Steingrímsson 25 af 28 (89,29%).
Refsingar: 10 mínútur.

Fjölnir

Mörk/stoðsendingar: Hektor Hrólfsson 1/1, Viggó Hlynsson 1/0, Kristján Jóhannsson 1/0, Hilmar Sverrisson 0/1, Jere Koikkalainen 0/1, Viktor Svavarsson 0/1, 
Varin skot: Þórir Aspar 31 af 35 (88,57%).
Refsingar: 20 mínútur.

Toppdeild karla - staða

Leikskýrslan

Næst:

• Laugardagur 12. desember
  Skautahöllin á Akureyri kl. 16:45
  SA - SR