Umræðan

Ungt íshokkífólk keppti í Stokkhólmi

Haraldur Ingólfsson skrifar 18. apríl 2025 | kl. 08:00

Fríður hópur ungmenna ásamt fylgiliði á svellinu í Stokkhólmi. Mynd: Ólafur Örn Þorgrímsson.

Sextán ungir og efnilegir íshokkíleikmenn Skautafélags Akureyrar tóku nýverið þátt í Uplandia Trophy í Stokkhólmi – alþjóðlegu íshokkímóti á vegum Sweden Hockey Trophy, sem sérhæfir sig í sterkum unglingamótum víðs vegar um Evrópu. Keppt var í AA deild, þar sem hörð samkeppni ríkir og öflug lið víðs vegar að tóku þátt.

Pökkurinn flýgur, en markvörðurinn tilbúinn að grípa með hanskanum. Mynd: Ólafur Örn Þorgrímsson.

Í tilkynningu um ferð ungmennanna til Stokkhólms segir meðal annars: „Mótið fór fram dagana 11.–13. apríl og stóðu leikmenn SA sig afburða vel, bæði innan og utan íssins. Þeir sýndu sterka liðsheild, baráttu og góða framkomu og fengu dýrmæta reynslu sem mun nýtast þeim vel í framtíðinni – bæði sem íþróttafólk og einstaklingar. Sweden Hockey Trophy er í eigu Sergei Zak, sem margir íslenskir íshokkíaðdáendur þekkja. Sergei lék með Skautafélaginu Birninum í Reykjavík á árum áður og hefur í dag byggt upp einn öflugasta mótavettvang Evrópu fyrir unga íshokkíleikara.“

Myndirnar með fréttinni tók Ólafur Örn Þorgrímsson