Þórsarar taka á móti liði Sindra í kvöld

Karlalið Þórs í körfuknattleik leikur fyrsta heimaleik sinn á nýhafinni leiktíð í kvöld þegar liðið tekur á móti Sindra frá Hornafirði í Íþróttahöllinni. Leikurinn hefst kl. 19:15.

Þórsarar hófu keppni á útivelli fyrir viku og töpuðu þá með 17 stiga mun fyrir Selfyssingum, 97-114. Mikið skorað í þeim leik, samtals 211 stig. Reynir Barðdal Róbertsson skoraði mest Þórsara í þeim leik, 33 stig. Á sama tíma vann Sindri þriggja stiga sigur á ÍA, 89-86. Þórsarar spiluðu án bandaríska leikmannsins Tims Dalger í fyrsta leik þar sem leikheimild hafði þá ekki gengið í gegn og ef marka má félagaskiptalista KKÍ á vef sambandsins er hann enn án leikheimildar, eða í það minnsta hefur nafn hans ekki verið birt á félagaskiptalistanum þegar þessi frétt er birt.