Samstöðuganga kennara verður í dag

Félagsmenn Kennarasambands Íslands (KÍ) á Akureyri og nágrenni fara í samstöðugöngu í dag, þriðjudag 12. nóvember, vegna kjaradeilu KÍ við viðsemjendur.

Safnast verður saman við Rósenborg og gengið af stað kl. 16.45. Gengið verður að Ráðhústorgi þar sem til máls taka Jónína Hauksdóttir, varaformaður KÍ, Daníel Freyr Jónsson, kennari við VMA, og Hólmfríður Þorgeirsdóttir, kennari í Lundarskóla. Lundarskóli er meðal níu skóla þar sem verkfallsaðgerðir standa nú yfir. 

„Með þessari göngu viljum við hvetja til þess að samningar náist sem fyrst og með þátttöku sýnum við það í verki. Öll sem telja sig málið varða og vilja styðja kennara og þá kröfu KÍ að fjárfesta í kennurum eru hjartanlega velkomin með í gönguna,“ segir í tilkynningu.