Opið hús og togari hjá ÚA vegna 80 ára afmælis

Í tilefni af 80 ára afmæli Útgerðarfélags Akureyringa er almenningi boðið að kynna sér starfsemi ÚA við Fiskitanga á Akureyri í dag, laugardaginn 31. maí, frá klukkan 11:00 til 13:00.

„Fiskvinnsluhús ÚA verður opið, ‏þar fer fram tæknivædd bolfiskvinnsla og unnar eru ferskar og frystar afurðir fyrir neytendamarkað,“ segir í tilkynningu frá Samherja.

Togarinn Kaldbakur EA 1 verður við Togarabryggju, sem verður opinn almenningi á sama tíma.

Í matsal ÚA verður boðið upp á veitingar í tilefni tímamótanna.

Fyrir framan fiskvinnsluhúsið er ljósmyndasýningin Myndbrot úr sögu ÚA, þar sem varpað er ljósi á sögu félagsins í 80 ár.

Sýning á Iðnaðarsafninu

Á sjómannadaginn, sunnudaginn 1. júní klukkan 13:00 verður opnuð sýningin Fagur fiskur úr sjó í Iðnaðarsafninu á Krókeyri á Akureyri. Á sýningunni er saga ÚA sögð með ljósmyndum, kvikmyndum og munum.

Sýningin markar upphaf að söfnun á sögum og minningum þeirra sem störfuðu hjá ÚA, segir í tilkynningunni frá Samherja.

Ókeypis er á sýninguna þennan dag og veitingar verða í boði.