Ólafur Gústafsson fer frá KA til FH

Ólafur Gústafsson, sem leikið hefur með handknattleiksliði KA undanfarin fjögur ár, hefur samið við uppeldisfélag sitt, FH. Þetta kemur fram á handboltavef Íslands, handbolti.is.

Ólafur er uppalinn hjá Hafnarfjarðarliðinu, vann Íslandsmeistaratitil með félaginu 2011 og fór þá utan til Þýskalands þar sem hann gerðist atvinnumaður hjá Flensburg í upphafi árs 2012. Þar vann hann meðal annars Meistaradeild Evrópu 2014, en flutti sig eftir það til Álaborgar þar sem hann spilaði í tvö ár. Eftir það kom hann heim og spilaði eitt tímabil með Stjörnunni en hélt svo aftur utan og var leikmaður KIF Kolding í Danmörku 2017-2020 þegar hann kom aftur heim til Íslands og samdi við KA. Hann á að baki 39 landsleiki.