Miðnætursúld leysir sólina af hólmi í ár

Arctic Open mót Golfklúbbs Akureyrar er gjarnan nefnt í sömu andrá og miðnætursólin og kennt við hana. Veðrið hefur oft leikið við kylfinga og ekki síður ljósmyndara, og margar stórglæsilegar sólarmyndir eru til úr 40 ára sögu þessa vinsæla móts. Slíkar myndir verða þó tæpast teknar í ár því sólin virðist hafa brugðið sér frá og í staðinn býður Veðurstofan upp á rigningu og skýjað, að minnsta kosti „með köflum“.

Kylfingar láta aðstæður reyndar ekkert á sig fá og voru hvergi bangnir á Jaðarsvelli í gær þegar keppni hófst. Mótið stendur í tvo daga og leiknar eru 18 holur hvorn dag. Þeir fyrstu voru ræstir út kl. 10.30 í gærmorgun og reiknað var með að þeir síðustu lyku keppni undir morgun. Aftur verður keppt í dag og næstu nótt og keppni lýkur í bítið í fyrramálið

Myndirnar voru teknar í gærkvöldi.