Bárðdælingurinn og fyrrum leikmaður Þórs, Tryggvi Snær Hlinason, vann í gær Evrópumeistaratitil í körfuknattleik með liði sínu Bilbao Basket. Liðið vann Evrópudeildina þrátt fyrir að hafa tapað seinni úrslitaleiknum gegn gríska liðinu PAOK frá Þessalóníku.
Fimm stigum munaði þegar upp var staðið eftir tvær viðureignir. Bilbao vann fyrri úrslitaleikinn með sjö stiga mun, 72-65, sem var tíundi sigur liðsins í jafn mörgum heimaleikjum í Evrópudeildinni. PAOK vann seinni leikinn í gær með tveggja stiga mun, 84-82. Má segja að það hafi verið talsvert afrek hjá spænska liðinu því gríðarleg stemning var í höllinni í Þessalóníku og um erfiðan útivöll að ræða. Sjö stiga sigurinn í fyrri leiknum dugði spænska liðinu til sigurs í keppninni.
