KA niður í 10. sæti eftir fjórða tapið í röð

KA beið lægri hlut gegn Breiðabliki á Kópavogsvelli í dag í viðureign liðanna í 11. umferð efstu deildar karla í knattspyrnu. Heimamenn unnu sanngjarnan 3:1 sigur og KA heldur áfram að síga niður töfluna. Þetta var fjórða tap liðsins í röð og það er nú komið niður í 10. sæti deildarinnar.

Þrátt fyrir að Blikar væru talsvert meira með boltann í fyrri hálfleik tókst þeim ekki að skapa sér nein færi að ráði. KA-menn áttu ágætar rispur inn á milli en Blikar réðu þó ferðinni lengst af.

Fyrsta mark leiksins kom ekki fyrr en á 58. mínútu þegar Blikinn Ágúst Orri Þorsteinsson óð inn í vítateiginn af hægri kantinum, lék á varnarmann og spyrnti boltanum í markið framhjá Steinþóri Má Auðunssyni markverði. Það tók KA ekki nema fimm mínútur að jafna þegar Danijel Dejan Djuric átti flotta sendingu inn í vítateig vinstra megin þar sem Birgir Baldvinsson kom á ferðinni, teygði sig í boltann á undan varnarmanni og þeytti honum viðstöðulaust í fjærhornið. Glæsileg afgreiðsla.

Á 74. mínútu komust heimamenn yfir á ný og aftur var það einstaklingsframtak frá hægri kanti. Óli Valur Ómarsson dansaði þá með boltann inn í vítateiginn, lagði hann svo fyrir sig og þrumaði honum óverjandi í fjærhornið. Mögulega hefðu varnarmenn KA þó getað truflað Óla Val aðeins meira. Skömmu síðar fékk Birgir tækifæri til að jafna leikinn aftur en setti knöttinn í hliðarnetið úr góðu færi. Blikar gerðu síðan út um leikinn á 85. mínútu þegar löng sending sem kom inn í vítateig hrökk af varnarmanni fyrir fætur hins fimmtán ára Arnars Bjarka Gunnleifssonar sem var á auðum sjó og skoraði af miklu öryggi sitt fyrsta mark í efstu deild. Steinþór Már gerði síðan vel að verja frá Viktori Karli Einarssyni úr dauðafæri í uppbótartíma en tapið varð ekki umflúið.

Næsti leikur KA er gegn Stjörnunni í Garðabæ næstkomandi sunnudag en Stjarnan er aðeins einu stigi ofar en KA og leikurinn því geysilega þýðingarmikill fyrir bæði lið.

Leikskýrslan á vef KSÍ

Staðan í deildinni