Jákvæð framvinda á svæði Skútabergs

Vinna við gerð geymslusvæðiðs og sjónmanar á athafnasvæði Skútabergs á Moldhaugahálsi er vel á veg komin og framkvæmdir hafnar við gerð varanlegs svæðis fyrir bíla og vagna í samræmi við deiliskipulag svæðisins. Þetta var staðfest við skoðun fulltrúa Heilbrigðisnefndar Norðurlands eystra á dögunum og kemur fram í fundargerð nefndarinnar.

„Heilbrigðisnefnd fagnar því að framkvæmdir til að bæta umgengni um svæðið séu hafnar. Nefndin ítrekar að ásýnd svæðisins er óviðunandi og því afar mikilvægt að unnið verði markvisst að nauðsynlegum úrbótum sem miða að því að bæta ásýnd þess,“ segir í bókun nefndarinnar. Starfsmönnum heilbrigðiseftirlitsins hefur verið falið að fylgjast með framkvæmdum og upplýsa nefndina um framvindu mála á svæðinu fyrir næsta fund hennar.

Skútaberg var áminnt af Heilbrigðisnefndinni í desember þegar ekki sáust nein merki þess að fyrirtækið hefði unnið samkvæmt framkvæmdaáætlun til að bæta umgengni og ásýnd svæðisins.