Fornbílar í göngugötunni á miðvikudagskvöldum

Fornbíladeild Bílaklúbbs Akureyrar hefur fengið undanþágu frá lokun göngugötunnar fyrir vélknúnum ökutækjum. Skipulagsráð hefur samþykkt beiðni deildarinnar um að fá að aka eftir göngugötunni á miðvikudagskvöldum frá maí og út september.

Skipulagsráð samþykkti í lok apríl erindi Þorgils Sævarssonar frá fornbíladeild Bílaklúbbsins þar sem óskar var undanþágu frá akstursbanninu. Fornbílaeigendur hafa safnast saman við Hof og stillt bílunum upp og hafa áhuga á að taka „rúnt“ og fara um göngugötuna tvisvar á hverju miðvikudagskvöldi til reynslu. Skipulagsráð hafði áður frestað afgreiðslu erindisins í mars. Sóley Björk Stefánsdóttir, V-lista, greiddi atkvæði gegn því að leyfa undanþáguna.

Sams konar umsókn var hafnað af meirihluta skipulagsráðs í júní 2024 þar sem um væri að ræða „nýsamþykkta breytingu og telur ráðið ekki æskilegt að breyta reglum fyrr en reynsla er komin á framkvæmdina.“ Helgi Sveinbjörn Jóhannsson, M-lista, sat hjá við þá afgreiðslu og Þórhallur Jónsson, D-lista, bókaði á móti afgreiðslu ráðsins þar sem hann taldi að akstur fornbílanna glæddi miðbæinn auknu lífi og skapaði stemningu.