VA arkitektar hanna íþróttamiðstöð Þórs

Akureyrarbær hefur ákveðið að semja við VA Arkitekta í Reykjavík um arkitektahönnun á íþróttahúsi og félagsaðstöðu fyrir Íþróttafélagið Þór. Alls bárust 10 tilboð í verkefnið. Tilboð VA Arkitekta var næst lægst í krónum talið, 71 milljón króna, en lægst þegar tillit var tekið til allra þátta.

Eftir því sem næst verður komist stendur til að fulltrúar Akureyrarbæjar og VA Arkitekta undirriti samning í vikunni og fulltrúar arkitektastofunnar skoði aðstæður á Þórssvæðinu í næstu viku og fundi með forráðamönnum félagsins. „Við erum mjög spenntir að svona stór og flott stofa hafi fengið þetta verkefni. Nú fara í hönd gríðarlega spennandi tímar sem er hönnunarvinna við húsið og þar ætlum við að vanda til verka með Akureyrarbæ og þessari arkitektastofunni,“ sagði Reimar Helgason framkvæmdastjóri Þórs við akureyri.net í dag.

Á vef VA Arkitekta má sjá nokkur íþróttamannvirki sem fyrirtæki hefur hannað:

• Íþróttahúsið Kórinn í Kópavogi 2006
• Dalslaug í Úlfarsárdal 2021
• Íþróttamiðstöð Fram í Úlfarsárdal 2022

Tvær fréttir akureyri.net um málið frá því í febrúar:

Þór fær íþróttahús – tekið í notkun 2031

Gleði í Hamri: Eitt stykki íþróttamiðstöð

Pláss fyrir 50 metra sundlaug?

Á fundi umhverfis- og mannvirkjaráðs Akureyrarbæjar, þar sem ákveðið var að ganga til samninga við VA Arkitekta, óskaði Ólafur Kjartansson  fulltrúi Vinstri grænna að eftirfarandi yrði bókað:

Það er eðlilegt að það verði kannað í alvöru hvort hægt sé að hanna mannvirkin þannig að pláss verði fyrir 50 m sundlaug á svæðinu. Það myndi fela í sér umtalsverða rekstrarhagkvæmni ef það væri mögulegt að tengja 50 m sundlaug öðrum íþróttamannvirkjum.