Fjórar milljónir vegna samræmdra símareglna

Bæjarráð Akureyrarbæjar samþykkti í morgun að gerður verði viðauki við fjárhagsáætlun ársins 2024 vegna kaupa á skápum og afþreyingarefni í tengslum við samræmdar símareglur sem taka gildi við upphaf skólaárs í grunnskólum Akureyrarbæjar í haust. Fræðslu- og lýðheilsuráð óskaði eftir fjórum milljónum króna vegna málsins. Bæjarráð fól sviðsstjóra fjársýslusviðs að vinna viðaukann.

• Símafrí í grunnskólum í byrjun næsta skólaárs | akureyri.net

Eins og fram kom í fyrri frétt Akureyri.net um símafrí í grunnskólunum eru nemendur hvattir til að skilja símana eftir heima, en ef þeir koma með símana í skólann eiga þeir ekki að hafa símann á sér. Nemendur í 8.-10. bekk geta þá geymt símana í læstum skápum í skólanum og yngri nemendur eiga að geyma símana í skólatöskunni.