Búast má við hörkuleik í Höllinni í kvöld

Kvennalið Þórs í körfuknattleik tekur á móti liði Njarðvíkur í Íþróttahöllinni á Akureyri í kvöld kl. 19:15. Búast má við hörkuleik því Njarðvíkingar eru í 2. sæti deildarinnar og Þór í 4. sæti. Þessi lið mættust í æfingaleik fyrir tímabilið og þar höfðu Þórsstelpurnar betur.

Keppni í efstu deild kvenna, Bónusdeildinni, er jafnari nú en oft áður. Fyrir ofan Þórsliðið eru Haukar, Njarðvík og Keflavík með sjö, sex og fimm sigra, en Þórsliðið hefur unnið fjóra leiki. Sigur í kvöld myndi því styrkja stöðu liðsins í efri hluta deildarinnar. Þórsliðið hefur hingað til unnið alla sína heimaleiki í deildinni og vann sinn fyrsta útisigur í síðustu umferð.

Með leiknum í kvöld, sem er í 9. umferð Bónusdeildarinnar, lýkur fyrri hluta deildarkeppninnar og Þórsliðið þar með búið að mæta öllum liðum deildarinnar einu sinni.

• Bónusdeild kvenna í körfuknattleik
  Íþróttahöllin á Akureyri kl. 19:15
  Þór - Njarðvík
• Staðan í deildinni