Pistlar

Sóðaskapur partígesta í Kjarnaskógi

Valur Sæmundsson skrifar 30. ágúst 2026 | kl. 06:00

Að hreinsa upp rusl eftir partígesti er sem betur fer ekki oft á dagskránni hjá starfsfólki Skógræktarfélags Eyfirðinga í Kjarnaskógi en virðist þó vera árlegur fylgifiskur skólabyrjunar á haustin. Myndir: Facebook-síða Skógræktarfélagsins.

Það var ófögur sjón sem blasti við starfsfólki Skógræktarfélags Eyfirðinga í Kjarnaskógi að morgni laugardags. Drykkjarvöruumbúðir og annað rusl var á víð og dreif og greinilegt að heljarinnar partí hafði verið haldið þar um nóttina.

Ingólfur Jóhannsson, framkvæmdastjóri Skógræktarfélagsins, setti myndband inn á Facebook-síðu félagsins á laugardagsmorguninn og var þungorður í garð þeirra sem svona gengju um. Auk þess að safna saman ruslinu utandyra þurfti Ingólfur m.a. að þrífa ælu af skiptiborði fyrir ungbörn inni á snyrtingu.

Ingólfur kallaði aðgerðina „síðasta slátt ársins í Kjarnaskógi.“

Í samtali við RUV sagðist Ingólfur gera ráð fyrir að þarna hefðu skólakrakkar verið á ferðinni og þetta væri ekki að gerast í fyrsta skipti. Krakkar hittust í skóginum að kvöldlagi og héldu skemmtanir og þetta fylgdi stundum skólabyrjun á haustin.

Kjarnaskógur er útivistarparadís sem mikil vinna fer í að sinna og viðhalda og svona umgengni auðveldar síður en svo það starf.

„Unga fólk. Að halda party í skólabyrjun er góð leið til að hrista saman hópinn, kynslóðir á undan ykkur hafa gert slíkt hið sama og komist til manns. Umgengni nætur er þó eitthvað sem ekki er í boði, ekkert ykkar er, eða vill vera slíkur sóði. Ræðið þetta í skólanum, svona þurfa hlutirnir ekki að vera,“ segir í innleggi Skógræktarfélagsins á Facebook.

Til baka í yfirlit pistla