Pistlar

Naumt tap hjá KA/Þór í fyrstu viðureign

Valur Sæmundsson skrifar 30. mars 2026 | kl. 11:00

Bernadett Leiner markvörður KA/Þórs stóð sig vel á laugardag. Hún hefur að mestu séð um markvörsluna síðan Matea Lonac meiddist fyrr í vetur. Myndir: Eyjólfur Garðarsson.

KA/Þór þurfti að sætta sig við ósigur gegn Haukum á útivelli sl. laugardag í fyrsta leik liðanna í úrslitakeppni efstu deildar kvenna í handknattleik, þrátt fyrir að hafa haft forystuna drjúgan hluta leiksins. Lokatölur urðu 27:24 Haukum í vil og KA/Þór þarf að vinna næsta leik á miðvikudaginn í KA-heimilinu, til að knýja fram oddaleik.

Fyrri hálfleikur var hnífjafn en KA/Þór þó yfirleitt á undan að skora. Haukar léku án síns markahæsta leikmanns, Jóhönnu Margrétar Sigurðardóttur, og áttu í stökustu vandræðum gegn sterkri vörn gestanna. Staðan í leikhléi var 13:11 KA/Þór í vil.

Susanne Denise Pettersen var markahæst hjá KA/Þór. Hér er hún tekin föstum tökum í bikarleik gegn Gróttu á Seltjarnarnesi í vetur.

Haukar betri í seinni hálfleik

Framan af seinni hálfleik hélt KA/Þór frumkvæðinu en eftir að vörn Haukastúlkna þéttist náðu þær að snúa leiknum sér í vil. Í stöðunni 18:18 skoruðu Haukar fjögur mörk í röð og þann mun náði KA/Þór aldrei að brúa. Lokatölur 27:24.

Susanne Denise Pettersen var markahæst hjá KA/Þór eins og oft áður en skotnýtingin hefur þó stundum verið betri. Bernadett Leiner stóð fyrir sínu í markinu en Matea Lonac er enn fjarri góðu gamni vegna höfuðmeiðsla.

KA/Þór þarf sigur á miðvikudag

Liðin mætast aftur í KA-heimilinu á miðvikudaginn kl. 18 og þá er að duga eða drepast fyrir KA/Þór. Tap í þeim leik þýðir að liðið er komið í sumarfrí en með sigri tryggja norðanstúlkur sér oddaleik í Hafnarfirði um næstu helgi. Sigurvegarinn í einvíginu mætir síðan ÍBV í undanúrslitum. Miðað við frammistöðuna í leiknum á laugardaginn á KA/Þór raunhæfa möguleika á að komast áfram og góður stuðningur áhorfenda í næsta leik gæti skipt sköpum.

Lydía Gunnþórsdóttir gerði sex mörk gegn Haukum á laugardag.

Mörk KA/Þórs: Susanne Denise Pettersen 7, Lydía Gunnþórsdóttir 6 (4 víti), Sólveig Lára Kristjánsdóttir 3, Anna Þyrí Halldórsdóttir 3, Kristín A. Jóhannsdóttir 2, Bergrós Ásta Guðmundsdóttir 1, Tinna Valgerður Gísladóttir 1, Trude Blestrud Hakonsen 1.

Varin skot: Bernadett Leiner 14 (34,1%).

Mörk Hauka: Embla Steindórsdóttir 9 (4 víti), Inga Dís Jóhannsdóttir 7, Sonja Lind Sigsteinsdóttir 5, Rakel Oddný Guðmundsdóttir 4, Alexandra Líf Arnarsdóttir 1, Thelma Melsted Björgvinsdóttir 1.

Varin skot: Elísa Helga Sigurðardóttir 9, Sara Sif Helgadóttir 4.

Öll tölfræði leiksins hjá HBStatz

Til baka í yfirlit pistla