KA tekur á móti Vestra í bikarkeppninni í kvöld

Karlalið KA í knattspyrnu mætir Vestra frá Ísafirði á KA-vellinum, Greifavellinum, í 16 liða úrslitum Mjólkurbikarkeppninnar í kvöld kl. 18.

KA-menn fóru alla leið í úrslitaleikinn í fyrra, en lutu í lægra haldi gegn Víkingum, 1-3. Vestri féll hins vegar úr leik strax í 64ra liða úrslitum keppninnar eftir tap fyrir Gróttu. Leikurinn í kvöld verður fyrsta viðureign þessara liða í bikarkeppni meistaraflokks karla og raunar aðeins önnur viðureign þeirra eftir að Ísfirðingar hófu að leika undir merkjum Vestra. Þessi félög mættust fyrst þegar Vestramenn fóru með eins marks sigur af hólmi í 3. umferð Bestu deildar karla í aprílmánuði. 

Vestri sló Hauka út í 32ja liða úrslitum með 4-2 sigri í Hafnarfirðinum. KA hóf bikargönguna á 3-1 útisigri gegn Þrótti í Vogum í 2. umferð keppninnar og vann svo ÍR-inga naumlega, 2-1, í 32ja liða úrslitunum þar sem Daníel Hafsteinsson skoraði seinna mark KA á næstsíðustu mínútu framlengingar, en jafnt var að loknum 90 mínútum, 1-1.