Jólakvöld séra Svavars Alfreðs

Séra Svavar Alfreð Jónsson skrifar reglulega pistla fyrir Akureyri.net – gjarnan í léttum dúr, enda mikill húmoristi. Að þessu sinni er pistill hans á öðrum nótum og í bundnu máli. 
_ _ _ _

Jólakvöld 

þitt hjarta saknar blessunar og birtu
og brjóst þitt fyllir sálin doðaköld
en kulnuð glóðin yl þér veitir aftur
því ástin finnur leið til þín í kvöld

þótt heimsins böli verði flest að vopni
og varmenni sig skrái á söguspjöld
mun bátur þinn á værum vogi sigla
því vonin finnur leið til þín í kvöld

við fljótsins harða straum þú nemur staðar
hin ströngu lögmál taka af þér völd
þú yfir kemst og treystir tæpu vaði
því trúin finnur leið til þín í kvöld

Svavar Alfreð Jónsson er sjúkrahúsprestur