Pistlar

Geðrækt í tali og tónum í gulri messu í kvöld

Haraldur Ingólfsson skrifar 20. september 2026 | kl. 17:00

Mynd: Þorgeir Baldursson

Akureyrar- og Glerársóknir standa saman að messu í Akureyrarkirkju í kvöld kl. 20. Um ræðir gula messu, sem hluta af vitundarvakningunni Gulur september.

Á meðal þess sem er á dagskránni er hugleiðing aðstandanda, en þar talar Tinna Arnar, móðir Ólafar Töru Harðardóttur, baráttukonu sem lést fyrir tæpum tveimur árum. „Það væri yndislegt að sjá ykkur sem flest í Gulu messunni í Akureyrarkirkju í kvöld kl 20. ... Ég er svo óendanlega þakklát henni Tinnu fyrir að koma og deila sinni sáru reynslu en miklu visku,“ skrifar séra Hildur Eir Bolladóttir í hvatningarorðum til fólks um að mæta í messuna í kvöld.

Auk þess mun Birgir Örn Steinarsson, sálfræðingur Píeta, koma fram og verður hans framlag bæði í tali og tónum. Þá munu Ívar Helgason og Pétur Nói Stefánsson einnig sjá um tónlistina. Prestar verða þau séra Hildur Eir Bolladóttir og séra Sindri Geir Óskarsson. Á eftir er gestum boðið í kaffi og afmælistertu í safnaðarheimili Akureyrarkirkju í tilefni af 10 ára afmæli Píeta og fimm ára afmæli Píetaskjólsins hér á Akureyri.

Vitundarvakningin Gulur september snýst um geðrækt og sjálfsvígsforvarnir, þar sem lögð er áhersla á að auka meðvitund fólks um mikilvægi geðræktar og sjálfsvígsforvarna með kærleika, aðgát og umhyggju að leiðarljósi.

Til baka í yfirlit pistla