Umræðan

Stöndum með Háskólanum á Akureyri

Jón Bjarnason skrifar 15. september 2025 | kl. 22:00

Áform eru uppi um að leggja Háskólann á Akureyri niður í sinni mynd og búa til nýja stofnun með breyttri skipan og sameiningu við aðrar.

Er verið að búa þannig um hnúta að hin nýja stofnun geti síðar runnið inn í samsteypu Háskóla Íslands í Reykjavík og eiga þar með á hættu að vera svipt forræði sínu, orðspori, kennitákni með nafni sínu og baklandi sem Akureyri með Norðurland er. Slík orðræða er stofnuninni, nemendum og starfinu öllu skaðleg og í raun vítaverð af hálfu stjórnvalda þegar ekkert er sem kallar á slíkt.

„Háskóli Íslands í Reykjavík“

Ef Háskólinn á Bifröst sem málið snýst um, er ekki lengur fær um að vera rekinn sem sjálfstæð menntastofnun er mun nær að láta hann renna inn í Háskóla í Reykjavík þar sem nánast allir starfsmenn hans búa og skrifstofur skólans eru.

Ef stjórnvöld telja sameiningar og niðurlagningu menntastofnana mikilvægar þá er nærtækast að sameina fyrst Háskóla Íslands og Háskólann í Reykjavík.

Þar skilur varla ein gata á milli. Þeir háskólar gætu auðveldar skipt um nafn og heitið „Háskóli Íslands í Reykjavík“. Sem ég þó ekki endilega mæli með.

Akureyringar og HA stúdentar mótmæla og vilja standa vörð um skólann sinn.

Bæjarráð Akureyrar hefur að sjálfssögðu mótmælt þessum áformum.

Aðalbjörn Jóhannsson, stúdent við félagsvísindadeild Háskólans á Akureyri, skrifaði einnig skoðanagrein á dögunum þar sem hann sagði stúdenta óttast að Háskólinn á Akureyri verði „einfalt útibú frá Háskóla Íslands.“

„Í raun sé verið að leggja niður Háskólann á Akureyri“: Er Akureyri að missa háskólann sinn? - Vísir

Háskólinn á Akureyri er ekki bara menntastofnun. Hann er ein af grunnstoðum samfélagsins á Norðurlandi og gríðarlega öflugur drifkraftur byggðafestu, atvinnulífs, nýsköpunar og mannlífs. Framtíð hans snertir samfélagið allt frá byggðalögum og menningu til efnahags- og atvinnuþróunar.

Að standa með skólanum sínum

Málið er einfaldlega það ef sitjandi rektor eða skólastjórn treystir sér ekki til þess að reka skólann á þeim forsendum sem stofnað er til hans og hann hefur verið ráðinn til, þá ber honum frekar að víkja en leggja skólann niður. Þarf þá að fá aðra til sem hefur burði til þess að taka starfið og stofnunina að sér. Hvet ég Akureyringa og Norðlendinga alla til þess að standa þétt að baki skóla síns.

Söguágrip Háskólans á Akureyri

Fyrir rúmu ári síðan tók ég saman ágrip af sögu Háskólans á Akureyri – aðdraganda og stofnun sem ég tel öllum hlutaðeigandi hollt að rifja upp.

Háskólinn á Akureyri - Söguágrip

Jón Bjarnason er fyrrverandi alþingismaður og ráðherra. Jón var skólastjóri Bændaskólans á Hólum í Hjaltadal 1981–1999.

Til baka í umræðuna

Stöndum með Háskólanum á Akureyri

Fundur á Akureyri um hættulega úrelta stjórnarskrá Íslands

Jákvæð áhrif millilandaflugs til Akureyrar eru miklu meiri en þú heldur

Opið bréf til Sigmundar Davíðs Gunnlaugssonar

Eflum SAk

Tryggjum öryggi eldri borgara

Duga aðgerðir ríkistjórnarinnar til að rífa fjölda eldri borgara úr fátæktargildrunni?