Skák: Símon varð líka hraðskákmeistari

Skákmaðurinn Símon Þórhallsson hefur verið í miklu stuði undanfarið og eftir að hafa unnið skákmót í Færeyjum og orðið Skákmeistari Akureyrar í fyrsta sinn gerði hann sér lítið fyrir og vann líka hraðskákmót Akureyrar.

Hraðskákmótið er skv. venju haldið í kjölfar Skákþings Akureyrar, þar sem Símon tryggði sér sigur í lokaumferðinni. Að þessu sinni mættu ellefu keppendur til leiks í hraðskákinni og tefldu allir við alla. Símon gerði sér lítið fyrir og vann allar sínar tíu skákir. Jón Kristinn Þorgeirsson varð annar með 9 vinninga en hann vann allar aðrar viðureignir en gegn Símoni. Fráfarandi hraðskákmeistari Akureyrar, Rúnar Sigurpálsson, varð þriðji með 7,5 vinninga.

Um næstu helgi fer fram fyrri hluti Íslandsmóts skákfélaga í Reykjavík og að venju teflir Skákfélag Akureyrar þar fram nokkrum skáksveitum.