Sjókvíaeldi við Eyjafjörð

Fulltrúar Vinstrihreyfingarinnar græns framboðs í Akureyrarbæ hafa alla tíð verið skýr í afstöðu sinni gagnvart sjókvíaeldi við Eyjafjörð. Á þessu kjörtímabili hefur VG verið eini flokkurinn í bæjarstjórn sem hefur bókað og ítrekað afstöðu sína gegn sjókvíaeldi í firðinum. Sú afstaða mun ekki breytast á komandi kjörtímabili.

Margir sérfræðingar hafa bent á hversu óumhverfisvænt sjókvíaeldi er. Til dæmis er úrgangur frá sjókvíaeldi í Noregi á við skolp frá íbúafjölda sem nemur um tífaldri íbúatölu landsins. Eldi á laxi í sjókvíum getur haft mikil og óafturkræf áhrif á náttúru. Árið 2020 taldi Hafrannsóknarstofnun ástæðu til að banna fiskeldi í sjókvíum í Eyjafirði, vegna stöðu villtra laxfiska, sérstaklega bleikju og einnig mögulegum neikvæðum vistfræðilegum áhrifum á lífríki fjarðarins.

Í frumvarpsdrögum atvinnuvegaráðherra er ekki kveðið á um friðun Eyjafjarðar sem er miður að okkar mati. Þó er tekið fram að afstaða sveitarstjórna hafi áhrif hvort staðbundið bann verði við starfseminni. Það er því gríðarlega mikilvægt að bæjarstjórn Akureyrarbæjar taki skýra afstöðu gegn sjókvíaeldi við fjörðinn, samfélaginu öllu til heilla. Nýting auðlinda á að vera sjálfbær. Leyfum náttúrunni að njóta vafans og fórnum ekki meiri hagsmunum fyrir minni.

Jana Salóme Ingibjargar Jósepsdóttir er oddviti Vinstrihreyfingarinnar græns framboðs á Akureyri.