Sjálfbærni

Sjálfbærni er nýlegt hugtak sem vel þess virði er að hugleiða og ræða.

„Þrjár meginstoðir sjálfbærrar þróunar eru: Vernd umhverfisins, félagsleg velferð og efnahagsvöxtur, en mikilvægt er skoða þessar þrjár stoðir heildrænt þegar leitast er við að hámarka efnahagslega og félagslega velferð án þess að skaða umhverfið“. (Heimild: Samtök atvinnulífsins).

 

Gamla kolanáman skapaði fátækum störf, gerði landeigendur ríka en skemmdi heilsu og mengaði umhverfið. Væri hún sjálfbær þá, þegar fáir kostir voru um orkugjafa, teldist hún það ekki í dag. Framleiðsla og sala á áfengi er líklega sjálfbær ef einungis er horft á efnahagsvöxt (lesist gróða) framleiðslu- og sölufyrirtækjanna en trúlega ekki sjálfbær fyrir samfélagið ef tekið er tillit til neikvæðra áhrifa á félagslega velferð. Ef ágóðavon fyrirtækja í ferðamannaþjónustu gengur of langt tapar Ísland aðdráttarafli sínu og það bitnar á sjálfbærni þessa atvinnusviðs og samfélagsins alls.

 

Vonandi verður sú nálgun sem felst í þessu hugtaki til góðs. Það er amk líklegt að sjálfbærni samfélagsins sé betur borgið ef við hugsum ekki aðeins um fjárhagslegan ávinning (gróða) heldur einnig félagslega (mannlega) þáttinn.