Ingibjörg er ljósið í myrkrinu

Um helgina fer ég á flokksþing Framsóknarflokksins. Ég ætla að kjósa nýjan formann sem getur rétt af kúrsinn eftir útreiðina í síðustu kosningum. Ég ætla að kjósa Ingibjörgu Isaksen og valið er auðvelt. Mótframbjóðandi hennar er varaformaður flokksins og hefur verið það síðustu tíu ár. Hún ber því fulla ábyrgð á stöðu flokksins ásamt formanni. Henni var hafnað í síðustu kosningum og féll af þingi. Formaður verður að sitja á Alþingi og taka þar þátt í þjóðmálaumræðu. Allt tal hennar um að það komi sér vel að formaður sé utan þings er í besta falli broslegt og veikburða tilraun til að skapa sér stöðu. Ég hef þekkt Ingibjörgu í mörg ár og veit hverjir kostir hennar eru. Hún er von flokksins til lengri tíma litið. Það mun taka töluverðan tíma að styrkja stöðu flokksins sem missti trúverðugleika með setu í afleitri ríkisstjórn í sjö ár. En Ingibjörg er ljósið í myrkrinu og hún brennur fyrir málefnum landsbyggðar. Ég skora á þingfulltrúa að styðja hana á sunnudaginn.

Jóhannes Gunnar Bjarnason er Framsóknarmaður