Fréttir
Bilun í skrúfubúnaði og Vilhelm varð vélarvana
28.11.2022 kl. 14:45
![](/static/news/lg/1669646356_vilhelm-forsidumynd-1500.jpg)
Vilhelm Þorsteinsson EA 11, uppsjávarskip Samherja. Ljósmynd af vef Samherja.
Bilun varð í dag í skrúfubúnaði Vilhelms Þorsteinssonar EA 11, uppsjávarskips Samherja, með þeim afleiðingum að skipið tók að sigla stjórnlaust aftur á bak og varð síðan vélarvana.
Þetta gerðist laust fyrir klukkan 13 þegar skipið var að koma að hafnarmynninu í Neskaupstaðarhöfn.
„Við þetta rak skipið upp að bröttum sandkanti sem er rétt sunnan við hafnarmynnið. Barði NK 120, skip Síldarvinnslunnar, kom strax til aðstoðar og dró Vilhelm að bryggju,“ segir á vef Samherja.
„Ekki er vitað um neinar skemmdir en eftir er að finna út hvað gerðist í vélbúnaðinum. Samkvæmt venju var Landhelgisgæsla umsvifalaust upplýst um hvað gerðist.“