Körfubolti: Annað tap Þórs í 1. deild kvenna
Kvennalið Þórs í körfubolta tapaði öðrum leik sínum í röð í 1. deildinni, og þar með öðrum leik sínum á tímabilinu, þegar liðið mætti Fjölni á útivelli í dag. Lokatölur urðu 94-75. Eftir 11 leikja sigurgöngu í deildinni hefur liðið nú tapað fyrir helstu keppinautunum í toppbaráttunni, Aþenu og Fjölni, en heldur þó 2. sæti deildarinnar.
Þór náði forystunni um tíma í fyrsta leikhlutanum, en Fjölnir jafnaði í 11-11 þegar fyrsti leikhlutinn var tæplega hálfnaður. Fátt gekk upp hjá Þórsliðinu á næstu mínútum, fjögur stig frá Þór á móti 15 stigum Fjölnis og munurinn allt í einu orðinn 11 stig eftir fyrsta leikhlutann. Þór náði að lagfæra stöðuna aðeins í öðrum leikhluta, munurinn sjö stig í leikhléi. Þórsliðinu gekk afar illa að hitta úr þriggja stiga skotum, hittu úr sex af 33 slíkum.
Fjölnir náði aftur að auka muninn í þriðja leikhlutanum og munurinn orðinn 16 stig fyrir lokafjórðunginn. Það breyttist lítið síðustu tíu mínúturnar þar til alveg í lokin að Fjölnir bætti við forystuna og náði mest 21 stigs forskoti, en munurinn að lokum 19 stig, 94-75.
Fjölnir - Þór (26-15) (23-27) 49-42 (21-12) (24-21) 94-75
Chloe Wilson skoraði flest stig Þórsara, 23, en Leilani Kapinus var langatkvæðamest Fjölniskvenna, skoraði 37 stig, tók 15 fráköst og átti átta stoðsendingar.
Helstu tölur hjá Þórsliðinu, stig/fráköst/stoðsendingar:
- Chloe Wilson 23/12/3 - 32 framlagspunktar
- Emma Karólína Snæbjarnardóttir 19/5/4
- Emilie Ravn 13/2/4
- Yvette Adriaans 12/9/2
- Sigurlaug Eva Jónasdóttir 8/2/1
- Karen Lind Helgadóttir 0/5/1
- Hjörtfríður Óðinsdóttir 0/0/1
Aþena vann stórsigur á KV og heldur toppsætinu sem liðið náði af Þór í síðustu umferð. Aþena hefur unnið 12 leiki, Þór 11 og Fjölnir tíu leiki. Þór vann fyrri leik liðanna sem fram fór á Akureyri í byrjun nóvember með 22 stigum, 81-59, og er því með betri innbyrðis árangur gegn Fjölni, þótt ekki hafi mátt miklu muna. Ekki er þó víst að árangur í innbyrðis viðureignum liðanna muni skipta máli þegar upp er staðið. Það veltur á úrslitum leikja sem eftir eru því Þórsliðið er enn með einum sigurleik meira en Fjölnir.
Þór á eftir að mæta ÍR, KV, Vestra, Selfossi og Snæfelli.
