Fáir heimaleikir, en mörg lið á faraldsfæti

Mörg Akureyrarlið verða á faraldsfæti um komandi helgi, frá fimmtudegi fram á sunnudag, útileikir í körfubolta, handbolta, blaki, íshokkí og fótbolta. Einu heimaleikir komandi viku eru í Lengjubikar karla í knattspynru, en bæði Þór og KA eiga heimaleiki, Þór á laugardag og KA á sunnudag. 

FIMMTUDAGUR 12. FEBRÚAR - körfubolti

Þórsarar hafa ekki átt sérlega góðu gengi að fagna í 1. deild karla í körfubolta, sitja í 10. sætinu af 12 liðum með þrjá sigra eftir fyrstu 16 leikina. Þeir eiga að vísu eftir að spila við nokkur lið á svipuðum slóðum, en næsti leikur er þó einn af þeim erfiðari í vetur. Þórsarar sækja Héraðsbúa heim, en Höttur er í efsta sæti deildarinnar, hefur unnið 14 leiki og aðeins tapað tveimur.

• 1. deild karla í körfubolta
  MVA-höllin á Egilsstöðum kl. 19:15
  Höttur - Þór 

- - -

FÖSTUDAGUR 13. FEBRÚAR - handbolti, blak, íshokkí

Karlalið Þórs í handbolta á fyrir höndum mjög mikilvægan leik í Olísdeildinni á föstudag. Þá er komið að heimsókn í Kórinn í Kópavogi. Þórsarar geta með sigri náð Selfyssingum og komist upp fyrir Stjörnuna, en þessi leið eiga þó auðvitað einnig leiki í næstu umferð, Selfyssingar úti gegn FH og Stjarnan heima gegn Haukum. HK er á sömu slóðum, situr í 10. sætinu með tíu stig, en á eftir leik sinn í 17. umferðinni, sem er í kvöld gegn botnliði ÍR. Kópavogsliðið getur því komist í 12 stig og farið upp í 8. sæti deildarinnar með sigri á ÍR í lokaleik 17. umferðarinnar.

• Olísdeild karla í handbolta
  Kórinn í Kópavogi kl. 19
  HK - Þór

- - -

Kvennalið KA í blaki er í 2. sæti Unbroken-deildarinnar með 34 stig úr 14 leikjum, átta stigum á eftir HK sem hefur leikið einum leik meira. KA fer í tveggja leikja höfuðborgarreisu um komandi helgi og verður fyrri leikurinn í Laugardalshöllinni á föstudagskvöld. Þar mætir KA sameiginlegu liði Þróttar R. og Blakfélags Hafnarfjaðar, sem er í 4. sæti deildarinnar með 17 stig úr 14 leikjum.

• Unbroken-deild kvenna í blaki
  Laugardalshöllin kl. 19:30
  Þróttur R./Blakfélag Hafnarfjarðar - KA

- - -

Kvennalið SA í íshokkí er langefst í Toppdeildinni, er með 33 stig úr 12 leikjum, en SR hefur náð sér í 17 stig í tíu leikjum. SA þarf því aðeins einn sigur í viðbót í síðustu fjórum leikjum sínum til að vinna deildarmeistaratitilinn og tryggja sér oddaleiksréttinn í úrslitaeinvíginu. Þrír af þessum fjórum leikjum eru reyndar gegn SR, sá næsti er á föstu dag í Reykjavík. 

• Toppdeild kvenna í íshokkí
  Skautahöllin í Reykjavík kl. 19:45
  SR - SA

- - -

LAUGARDAGUR 14. FEBRÚAR - handbolti, fótbolti, blak, íshokkí

KA/Þór situr nokkuð örugglega í 6. sæti Olísdeildarinnar með 13 stig eftir 16 umferðir. Átta stig eru niður í næsta lið, Stjörnuna, en ofan við KA/Þór eru Fram og Haukar með fjórum stigum meira. Á laugardag er komið að heimsókn á Selfoss, en Selfyssingar sitja á botni deildarinnar með fjögur stig. Með sigri getur KA/Þór endanlega tryggt sæti sitt í úrslitakeppninni, en nú eru fimm umferðir eftir af deildarkeppninni.

• Olísdeild kvenna í handbolta
  Set-höllin á Selfossi kl. 15
  Selfoss - KA/Þór

- - -

Karlalið KA í handbolta er í 5. sæti Olísdeildarinnar með 22 stig þegar fimm umferðir eru eftir af deildarkeppninni. KA hefur safnað mörgum stigum á heimavelli, en næsti leikur er útileikur gegn toppliði deildarinnar, Val. Valur er þó ekki langt undan því fjórum stigum munar á þessum liðum.

• Olísdeild karla í handbolta
  N1 höllin að Hlíðarenda kl. 15
  Valur - KA

- - -

Þór/KA sækir Þrótt og fyrrum þjálfara sinn, Jóhann Kristin Gunnarsson, heim í öðrum leik sínum í riðli 1 í A-deild Lengjubikarsins á laugardag. Liðið tapaði fyrsta leik sínum um liðna helgi, 3-5, á útivelli gegn Stjörnunni. Þetta verður hins vegar fyrsti leikur Þróttar í mótinu.

• Lengjubikar kvenna í knattspyrnu
  AVIS-völlurinn í Laugardal kl. 15
  Þróttur - Þór/KA 

- - -

Þórsarar náðu í eitt stig á Skagann í fyrsta leik sínum í riðli 2 í A-deild Lengjubikarsins um liðna helgi, en á laugardag er komið að heimaleik þegar þeir taka á móti Seltirningum í Gróttu. Grótta hefur tapað fyrstu tveimur leikjum sínum í Lengjubikarnum, 0-2 á móti Val og Aftureldingu. Leikurinn er skráður á Þórsvöll á vef KSÍ, en gera má ráð fyrir að því verði breytt og spilað verði í Boganum. 

• Lengjubikar karla í knattspyrnu, A-deild
  Þórsvöllur kl. 15
  Þór - Grótta

- - -

Seinni leikur KA í höfuðborgarreisunni verður í Mosfellsbænum á laugardag, gegn liði Aftureldingar. Mosfellingar eru í 5. sæti deildarinnar með 14 stig úr 14 leikjum.

• Unbroken-deild kvenna í blaki
  Íþróttamiðstöðin að Varmá kl. 15:30
  Afturelding - KA

- - -

SA Víkingar, karlalið Skautafélags Akureyrar í íshokkí, er í baráttu um deildarmeistaratitilinn við lið SR, en Reykvíkingar standa örlítið betur að vígi, eru í efsta sæti Toppdeildarinnar með 26 stig úr 12 leikjum, en SA með 22 stig úr 11 leikjum. Ljóst er að þessi lið munu mætast í úrslitaeinvíginu um Íslandsmeistaratitilinn.

SA mætir hins vegar Fjölni á útivelli á laugardag og getur með sigri komið sér upp að hælum SR-inga. Það má því búast við spennandi leikjum næstu þrjár vikurnar áður en það ræðst hvaða lið vinnur deildarmeistaratitilinn og þar með oddaleiksréttinn í úrslitaeinvíginu. 

• Toppdeild karla í íshokkí
  Egilshöll kl. 16:45
  Fjölnir - SA 

SUNNUDAGUR 15. FEBRÚAR - körfubolti, fótbolti

Kvennalið Þórs í körfubolta tapaði toppsæti 1. deildarinnar í síðustu umferð til Aþenu, en liðin eru hnífjöfn á toppnum, bæði með 11 sigra og eitt tap, en Aþena með betra stigaskor í innbyrðis viðureignunum. Næsti leikur liðsins getur skipt sköpum um framhaldið því á sunnudag er komið að heimsókn í Grafarvoginn, en Fjölnir er í 3. sæti deildarinnar með níu sigra.

• 1. deild kvenna í körfubolta
  Dalhús í Grafarvogi kl. 16
  Fjölnir - Þór

- - -

Karlalið KA í knattspyrnu hefur tapað fyrstu tveimur leikjum sínum í riðli 3 í A-deild Lengjubikarsins, fyrst heima gegn KR og svo úti á móti ÍR um liðna helgi. Næstu andstæðingar eru Íslandsmeistarar Víkinga, sem koma norður á sunnudag. Víkingar eru með fjögur stig eftir fyrstu tvo leiki sína.

• Lengjubikar karla í knattspyrnu, A-deild
  Boginn kl. 16:30
  KA - Víkingur

- - -