Fara í efni
Fréttir

Skila sér á heimaslóð eftir læknanám í Slóvakíu

Nýstúdentar frá MA 17. júní síðasliðinn ásamt Jóni Má Héðinssyni, skólameistara, og Sigurlaugu A. Gu…
Nýstúdentar frá MA 17. júní síðasliðinn ásamt Jóni Má Héðinssyni, skólameistara, og Sigurlaugu A. Gunnarsdóttur, aðstoðarskólameistara. Ljósmynd: Skapti Hallgrímsson.

Kynn­ing­ar­sam­starf Mennta­skól­ans á Ak­ur­eyri við lækna­deild há­skól­ans í Mart­in í Slóvakíu hef­ur skilað þeim ár­angri að fjöl­marg­ir stúd­ent­ar frá norðlensk­um fram­halds­skól­um hafa farið í lækna­nám í Slóvakíu. Nokkrir fyrrverandi nemendur MA eru komnir aftur heim á norðlenskar slóðir til starfa, eftir nám í Slóvakíu. Þetta segir Jón Már Héðinsson, skólameistari MA, í Morgunblaðinu í dag.

Í Morgunblaðinu kemur fram að af um 1.700 nem­um í lækna­námi við háskólann í Martin séu 600 er­lend­ir, þar af flest­ir frá Nor­egi og Íslandi.

„Farsælt samstarf hefur í rúman áratug verið á milli MA og læknadeildarinnar ytra og hafa þó nokkuð margir nemar við báða framhaldsskólana á Akureyri auk fleiri norðlenskra skóla stundað læknanám í Martin í Slóvakíu. Jón Már Héðinsson, skólameistari Menntaskólans á Akureyri, segir að væntanlegir nemar við læknadeildina þreyti aðgangspróf sem byggist að mestu á grunnatriðum í líffræði og efnafræði og þeir sem standist það fái skólavist. Heimavist er við skólann en margir MA-nemar hafa reynslu af slíku fyrirkomulagi. Um 1.700 nemar eru við Jessenius-læknadeildina, þar af um 600 erlendir, flestir frá Noregi og Íslandi,“ segir í Morgunblaðinu.

„Það hafa þó nokkuð margir fyrrverandi nemendur okkar útskrifast frá læknadeildinni í Slóvakíu og starfa á heilbrigðisstofnunum hér um slóðir. Ég heyri vel látið af þeim, þeir þykja góðir og vel menntaðir starfsmenn.“

Jón Már segir við Akureyri.net að eftir útskrift frá læknadeildinni í Slóvakíu gætu Íslendingarnir skilið eitthvað í pólsku, sem væri gott að hafa í bakhöndinni á Norðurlöndunum þar sem mikið er um Pólverja. „Það er ágætis valkostur við annað námsframboð á þessu sviði að geta boðið upp á námið í Slóvakíu,“ segir Jón Már Héðinsson.

  • Upphaflega var haft eftir Jóni, og vitnað í Morgunblaðið, að nemendur hefðu vald á pólsku eftir námið í Slóvakíu. Hann segir það full djúpt í árinni tekið; hann hafi sagt að þeir skildu eitthvað í pólsku. Því hefur verið breytt í þessari frétt.
  • Vinnustofa þar sem kynnt verður læknanám við Jessenius-læknadeildina við háskólann í Martin í Slóvakíu verður í Menntaskólanum á Akureyri nk. fimmtudag, 19. ágúst, kl. 14.